Voltamos ás aulas coa triste nova do pasamento de Isaac Díaz Pardo. Sirva esta pequena recompilación de citas extraídas da prensa nos últimos días como mostra de homenaxe a unha figura inesquecible da nosa cultura.
“A súa personalidade, marcada pola xenerosidade, atraeu centos de persoas que viron en Díaz Pardo un referente . Foi unha figura singular e irrepetible".
Xosé Luís Méndez Ferrín
“Isaac Díaz Pardo non só deseñaba cerámica, senón que facía tamén os deseños dos fornos, da maquinaria, as engranaxes... foi un auténtico tecnólogo, un innovador, un creador. Foi un descreído optimista que non deixou de traballar polo futuro”.
Xosé Neira Vilas
“O home máis querido de Galicia. Foi un supervivinte toda a súa vida. Morreu ancián, pero siempre tivo que mirar de esguello á historia porque estaba na listaxe da maquinaria pesada do odio”.
Manuel Rivas
“Despedimos ao grande mariñeiro de Galicia, hoxe quedamos orfos de patrón”.
Xesús Alonso Montero
“ O pintor, o fundador de cerámicas de Sargadelos e do Castro, de Edicións do Castro, e doutras entidades dinamizadoras que responden a unha aspiración que el sempre mantivo: normalizar Galiza”.
Xosé Lois García
“No ano 36 era un esquerdista de 16 años, comprometido coa autonomía galega, que se ve lanzado á loita política. Tivo que sobrevivir no mundo dos asasinos do seu pai”.
Suso de Toro
“Mente preclara e faro de longo alcance, foi un deses seres que constrúen un país, unha cultura, pois as súas vidas son unha obra en si mesma”.
Público.es
“Díaz Pardo impúxose a tarefa de preservar, fortalecer e reconstruír a cultura e a memoria de Galicia. Acometeu á vez as facetas de empresario cultural, deseñador industrial, escritor, editor, promotor e mecenas de proxectos”.
El País
“A morte de Isaac Díaz Pardo deixou orfa a Galicia dun dos últimos intelectuais do galeguismo histórico e unha figura irrepetible, como o describiron centos de galegos no libro de condolencias instalado na capela ardente”.
Galiciaé
