Alfabetización

Alfabetización e dereitos: A alfabetización é un dereito inalienable de todo ser humano, sen o cal é practicamente imposible acceder aos demais dereitos. A prolongación da vida e a diminución da taxa de mortalidade infantil gardan unha estreita relación coa expansión da cobertura educativa e a alfabetización. Analfabetismo e pobreza van da man. Hoxe sabemos con datos fidedignos que aquelas persoas que non accederon á escolarización e non tiveron oportunidades para poder aprender a ler e a escribir atópanse maioritariamente entre o sector da poboación que vive con menos dun dólar ao día.
Alfabetización para a participación política: As persoas que non saiban ler nin escribir, non poderán acceder aos dereitos individuais e tampouco poderán participar na consecución dos dereitos colectivos, que son esenciais para a dignidade humana. Un proceso democrático necesita de persoas alfabetizadas que participen activamente no mesmo.
Alfabetización e desenvolvemento económico: Existe unha correlación de taxas de alfabetización coa produtividade dun país e o seu PIB per cápita. A UNESCO sinalou como países cunha taxa de alfabetización superior ao 80% obteñen un PIB cinco veces maior .
Alfabetización e maior equidade de xénero: as mulleres adultas analfabetas teñen moitas máis dificultades para participar nos asuntos comunitarios e para establecer relacións familiares horizontais e beneficiosas para todos/as.