13/2/17

NOVA EDICIÓN DO CONCURSO AMOR OMNIA VINCIT


       Con motivo da celebración do Día dos Namorados, mañá, 14 de febreiro, colocaranse no corredor da biblioteca máis de 50 carteis elaborados polo alumnado do IES baixo a coordinación do profesorado de linguas (inglés, francés, latín e grego, galego e castelán). Neles recóllense historias de amor de todos os tempos e de diferentes ámbitos da realidade (literatura, mitoloxía, cinema, pintura, ciencia...). 

         O equipo de biblioteca convoca, coa axuda do profesorado arriba citado, unha nova edición do concurso Amor omnia vincit, no que o alumnado inscrito deberá respostar tres cuestións diarias sobre información diversa recollida na exposición: animádevos, os dous equipos que acaden mellores resultados teñen o premio asegurado!! 



30/1/17

DÍA DA ILUSTRACIÓN

Dende hai catro anos celébrase o Día da Ilustración o 30 de xaneiro (data de  nacemento de Alfonso D. R. Castelao) coa intención de que as figuras destacadas da ilustración en Galicia reciban un merecido tributo para revalorizar a súa contribución á nosa cultura e á nosa sociedade. 

Este ano homenaxéase a a un dos grandes ilustradores galegos: Álvaro Cebreiro (A Coruña, 1903-1956). Aquí vos deixamos un pequeno vídeo producido por AGPI (Asociación Galega de Profesionais da Ilustración) coa colaboración da Subdirección Xeral de Bibliotecas para contribuír á difusión da súa vida e obra. 

29/1/17

LITERATURA E PAZ

 
     Velaquí a contribución, desde o mundo das artes, e en concreto desde o ámbito da literatura en lingua castelá, á reivindicación da paz coma unha das condicións fundamentais para vivirmos nun mundo cada vez mellor, onde o respecto, a dignidade e o altruísmo formen parte do día a día en calquer lugar.
      O alumnado de 1º de bacharelato, apoiandose nos formatos do haiku e do microrrelato, fixo a súa propia literatura:  deixannos aquí pequenas sementes pensadas para agromar nos campos, moitas veces, ermos, das conciencias.


19/1/17

VÍDEO-RECENSIÓN DE O ÚNICO QUE QUEDA É O AMOR

 No blog do club de lectura do noso centro damos conta das reunións e postas en común nas que falamos dos libros que compartimos. Elaboramos resumos, recensións, presentacións ou vídeos tomando como base as lecturas que nos conmoven, divirten, aterrorizan... Velaquí unha mostra: un magnífico vídeo elaborado por Laura Míguez de 4ºESO A, quen, como unha verdadeira "booktuber",  nos recomenda un libro de relatos de  Agustín Fernández Paz que vai camiño de converterse nun clásico das nosas letras.


21/12/16

PARA LER NO NADAL...OU MÁIS ADIANTE

Coma sempre, o Equipo de biblioteca vén de realizar un tríptico con propostas de lecturas actuais. Como veñen días nos que sempre ha de quedar un oco para coller un libro entre as mans ou para irmos de librarías na procura dun agasallo para os nosos, este pode ser un bo compás para orientarnos.

19/12/16

AS AVENTURAS DE TOM SAWYER



  Inmersos na actividade frenética do final de trimestre (entre exames, traballos, cálculo de notas medias, boletíns de recomendacións lectoras para o Nadal…)  aproveitamos para reivindicar unha vez máis a lectura dos clásicos intemporais. Aquí vos deixamos unha recensión elaborada por Victoria Iglesias.

“Nunca permitín que a escola interferise na miña educación”, esta inesquecible frase pronunciouna o escritor americano  máis recoñecido do século XIX, Samuel Langhome Clemens, alias Mark Twain, autor de As aventuras de Tom Sawyer.

Poderíase  dicir que esa sinxela  cita reflicte o contido por excelencia da crítica social que envolve, ás veces disimulada e outras, pola contra, de xeito inquisidor,  cada novela do escritor,  facendo fincapé precisamente no espírito do incansable protagonista desta historia:  Tom Sawyer.
É aló polo ano 1876, en plena Guerra de Secesión americana,  cando se publica esta novela de aventuras ambientada nunha aldea imaxinaria de San Petersburgo, pretiño do río Mississippi. O autor aclara concienciudamente:  non é  unha obra só para nenos.  Así pois, afastados do desastre da guerra e a perda de valores humanos do imperialismo, protexidos pola casca da infancia, Tom e tantos rapaces da aldea, entre eles a súa irresistible amada, Becky,  o seu mellor amigo Joe Harper  e  o rebelde Huckleberry Finn, viven mil e unha aventuras na procura de cumprir os seus soños, afastados, por suposto,  de ríxidos valores morais e normas pétreas dos adultos que xa perderon toda condición de liberdade.
 A descrición dos raparigos da novela é unha mostra maxistral de todos aqueles que fomos nenos nalgún momento; a de todas as persoas do mundo sen importar condición algunha, nun reflexo de mención universal. Os desexos máis íntimos, as inquedanzas, o ánimo incorruptible cargado de fe e adoración, a  constancia e,  por último, a fonte inabarcable de soños  polos que loitar: o amor dunha rapaza, a liberdade do ser humano,  a procura dun tesouro que é a ilusión e finalmente, a xustiza que debe reinar para non perder o fío da crenza.
Ao mesmo tempo atopamos nestes rapaces tan ben entendidos, tan ben coñecidos por todos nós, unha crítica lixeira pero punzante da realidade que eles interpretan á súa maneira e que o lector adulto pode observar, non é a correcta. Tom e os seus amigos imitan o que ven, facendo en moitos casos unha interpretación inocente da realidade.  E por iso, os protagonistas son piratas que viven na liberdade máis plena, acampados a uns quilómetros da casa; son ladróns que rouban un anaco de touciño e morren de remorsos despois; son exploradores que se meten nunha cova para xogar ás escondidas. Porén, tamén vemos como loita a súa mente contra eses preceptos ilóxicos, ridículos nos que se sustenta a sociedade do momento e os cales eles mesmos cuestionan: escravitude, deshumanización e hipocrisía. No camiño da súa evolución persoal descobren que os negros poden ser bos e xenerosos se os tratan ben, que Huck, por vivir en semiliberdade, seguindo as súas propias normas é ignorado socialmente ata que demostra a bondade do seu corazón e de paso, se fai cun botín.
O mellor do libro é que todas esas ideas, todos eses prexuízos reinantes, se amosan en boca de nenos que loitan por seguir os seus soños, nun estado de ignorancia, de fantasía, de inocencia patriótica, esquecida na transición cara a madurez. Esta novela é en realidade, unha chamada á reflexión e á nostalxia perdida nun mar de fanatismo relixioso, indiferenza e violencia contra o que loitou Mark Twain toda a súa vida. Tamén aparecen constantemente, valores como optimismo e esperanza de cambio: vemos segundas oportunidades, loita e finalmente triunfo de Tom e Huck contra o malo do indio Joe, o achado do tesouro, a conquista do amor de Becky  e da aprobación xeral malia todas as loucuras deses galopíns dramáticos que embelecen a novela coas súas trasnadas.
Un gran libro dun grandísimo escritor, que soubo incluírme de forma inmellorable na rutina diaria da rapazada do Mississippi. Fun pirata, usureira, Robin Hood, ladroa, incomprendida e exploradora. Todos fomos moitas cousas, a maioría esquecidas, que podemos lembrar tan só indo á biblioteca e pedindo:  As aventuras de Tom Sawyer.
Quedemos reflexionando sobre esa frase tan preciosa de Becky:
“Tom, como puideches ser tan nobre?”

VICTORIA IGLESIAS 2ºBAC B

2/12/16

MERECIDÍSIMO CERVANTES PARA E. MENDOZA


   
  
     Eduardo Mendoza acaba de ser elegido como ganador del Premio Cervantes 2016, el galardón más prestigioso de la literatura española, por su narrativa "llena de sutilezas e ironía", según destacó el jurado del autor barcelonés, reconocido por el gran público y por la crítica desde los inicios de su carrera, en 1975. Fue ese el año en el que Mendoza (Barcelona, 1943) publicó la novela La verdad sobre el caso Savolta, con la que inauguró una nueva etapa en la narrativa española, devolviendo al lector "el goce por el relato y el interés por la historia que se cuenta", como puso de manifiesto el jurado. 


     Desde nuestro IES,  y especialmente desde el Club de Lectura Fendetestas, donde estamos disfrutando de la lectura de El asombroso viaje de Pomponio Flato, queremos mostrar la satisfacción que nos produce el reconocimiento de la trayectoria y de la obra de un autor que, en repetidas ocasiones,  ha subrayado su deuda cervantina y la consideración del humor "como una forma de estar en el mundo", practicada por él en su extensa labor narrativa. 


25/11/16

COMA SEMPRE, CONTRA A VIOLENCIA DE XÉNERO


    
   Día a día, en todos os espazos nos que transcorre a xornada no noso IES, tentamos dar  pasos adiante para chegar ao paraíso dunha sociedade sen violencia, rexida polo respecto e o diálogo e espida de prexuizos e valoracións despectivas.


      E hoxe, Día contra a violencia de xénero, queremos facer aínda máis visible a nosa pegada nese camiño cara a un mundo mellor. Para iso, colocamos no corredor da biblioteca carteis alusivos a esta lacra social e recortes de prensa que os noso alumnado trouxo para facer máis visible o que xa o é en demasía.  E aquí vos deixamos, ademais,  a mensaxe tan tenra como terrible, que o  cantautor Pedro Guerra, nos fai chegar na súa canción "Hogar": non o esquezades, a protagonista do tema vive en moitos lugares e en distintos momentos... No noso tamén.


video


24/11/16

SICIXIA

O vindeiro venres 25 chega a todos os cines de Galicia Sicixia, unha película de Ignacio Vilar (Pradolongo, Vilamor, A esmorga) concibida como unha experiencia sensorial; a banda sonora da Costa da Morte. 

Velaquí a sinopse da película: Xiao é un enxeñeiro de son que recorre as vilas e lugares máis recónditos de Galicia na procura dos sons, das xentes e a natureza. Nesta viaxe coñecerá a Olalla, quen traballa na colleita de algas, e que espertará en Xiao a paixón pola vida, a terra e o salvaxe da Costa da Morte.

 Sicixia é unha palabra que fai referencia á aliñación dos astros que se produce nas superlúas e no solsticio de verán. Segundo Ignacio Vilar, os astros quixeron que a película, que vén de ser cualificada polo Instituto de la Cinematografía y de las Artes Audiovisuales como de especial interese para fomentar a igualdade de xénero, chegue ás salas o Día Internacional contra a Violencia Machista.

 

17/11/16

PARABÉNS PARA UNS MAGNÍFICOS EXPLORADORES!

       
  
         Temos que deixar constancia, pola satisfacción que nos produce, da boa acollida e do éxito do concurso de busca de libros de misterio! Nada menos que doce equipos afanáronse en atopar, de xeito ben rápido, cada un dos materiais que estaba "agochado" nos andeis da nosa biblioteca.  A actividade desenvolveuse de xeito tan fluído que os dous recreos propostos inicialmente, quedaron unicamente nun: en 20 minutos os participantes atoparon absolutamente todo o que se lles pediu. 

         Cómpre dicirvos, tamén,  que o que atoparon os nosos rapaces no medio das arrepiantes  páxinas dos libros de Poe, de X. Miranda ou de C. López Narváez e dentro das caixas de inquedantes DVD de Hitchcock ou de Amenábar foron saborosos vales para saciar a fame na cafetaría do IES ou para adozar o padal con algunha larpeirada neste mes, no que os espíritos e o misterio anda a voltas pola nosa fantasía. 
Neste blog utilizamos as imaxes con fins educativos. Se algunha delas estivese suxeita a dereitos de autor, pregamos vos poñades en contacto connosco para retirala de inmediato.



Deseño logo: shouvas