Para achegarme a il
Houben de atravesar
Dúas chousas
A herba estaba tan húmida
A terra tan lenturenta
Que me enchoupei a feito
Toda a roupa
Ecoaban os chíos contra todo
O ceo aquí e aló
Como se fora il mesmo
Unha laverca multiplicada
En diferentes sons
Dentro da media lúa
Onde antano medraban os ósos
Cara á seguinte vida
Achou abeiro un palitroque
Dixital
Apenas fica nada
Diste sagrario de pedras
Repartidas agora
Polos cerrumes dos prados
Mais ó tocalas unha a unha
Agarimando os ocos
Diste ventre nupcial
Recoñecín
O pulo exacto das bestas
No hay comentarios:
Publicar un comentario