O 1° de maio de 1886 a folga pola xornada de oito horas estalou de costa á costa dos Estados Unidos. Máis de cinco mil fábricas foron paralizadas e 340.000 obreiros saíron a rúas e prazas a manifestar a súa esixencia. En Chicago os sucesos tomaron rapidamente un sesgo violento, que culminou na masacre da praza Haymarket (4 de maio) e no posterior xuízo amañado contra os dirixentes anarquistas e socialistas desa cidade, catro dos cales foron aforcados un ano e medio despois.
Cando os mártires de Chicago subían ao cadalso, concluía a fase máis dramática da presión das masas asalariadas (en Europa e América) por limitar a xornada de traballo. Foi unha loita que durou décadas e cuxa historia foi esquecida, ocultada ou limpada de todo contido social, ata o punto de transformar nalgúns países o 1.° de maio en mero “festivo” ou nun día franco máis. Pero só tendo presente o que ocorreu, adquire total significación a data designada desde entón como “Día Internacional dos Traballadores”.
No hay comentarios:
Publicar un comentario