Tamara e Alicia entrevistan a Riveiro Coello

E aínda non virades a dúas xornalistas magníficas: Tamara Cao e Alicia Seoane entrevistando a Riveiro Coello!

O momento actual da literatura galega, a dobraxe do audiovisual, a subvención aos medios, e a escrita en galego son algúns dos temas abordados.

 

Encontro literario con Marcos Calveiro

O pasado catro de marzo os alumnos e alumas de 2º ESO tivemos connosco a Marcos Calveiro, o autor de Palabras de auga.

Encargouse da súa presentación José Manuel López Varela que foi agasallado cun sonoro aplauso.

Comezou a súa intervención cunha presentación coa que nos foi explicando polo miúdo algúns dos aspectos tratados na obra. Por exemplo, contounos que este libro nacera a raíz dunha imaxe que vira, na que unhas mulleres lles quitaban o alimento ás formigas para alimentar os seus fillos, e que iso o desacougara moito.

Falounos dos nenos escravizados nas minas de coltan, das condicións infrahumanas nas que se desenvolve o seu día a día para que nos poidamos cambiar de teléfono móbil a cada pouco.

Tamén dos nenos soldado e como moitos deles son obrigados a cometer tales barbaridades que acaban por ser irrecuperables, como acontece con Numba, un dos personaxes de Palabras de auga.

Relatounos a longa viaxe ao longo de África que teñen que facer algúns para non morrer de fame pero, ao chegar, a Melilla atópanse coas coitelas que lles impiden o paso.

Soubemos que a tribo do libro non é real, senón inventada polo autor, pero si os costumes que aparecen reflectidos. Falounos dos masai, das súas excelentes cualidades físicas e de como son os seus poboados.

Logo, as rapazas e rapaces tivemos ocasión de  formularlle as nosas preguntas e aclarar algunha que outra dúbida. Confesounos que é unha persoa completamente namorada do seu traballo, á que lle encanta ler e, como non, escribir.

Considera que a literatura infantil e xuvenil galega é a mellor de toda España e está á altura de calquera literatura europea. Segundo el, autores coma Xabier P. Docampo ou Agustín Fernández Paz abríronlle o camiño á literatura galega e escritores novos coma el simplemente van detrás. Foi unha grande honra para el que esta obra figure nas listas de honra do IBBY.

Para rematar recomendounos ler un libro de Janne Taller, Nada, prohibido en moitos países. Haberá que lelo, ou  vós que pensades?

Foi todo un pracer escoitalo e conversar con el. Moitas grazas,  Marcos!

Lucía Pérez López, 2º ESO A

ENCONTRO CON TUCHO CALVO

Dentro do marco da nosa Semana Cultural tivemos a oportunidade de escoitar e charlar co xornalista, editor e escritor Tucho Calvo. Acudiu á nosa biblioteca para falarnos da tarefa creativa e da súa novela Formigas. Deixámosvos aquí algunhas das nosas impresións sobre esta actividade:

- Chamounos a atención que comezase léndonos un relato de Rafael Dieste, pertencente á obra Dos arquivos do trasno, co que nos mergullou na temática do suspense e do medo.

- Non pensabamos que a creación literaria esixise un traballo de investigación e documentación previos: no caso de Formigas, foi moito o que tivo que ler sobre estes insectos para construír un relato coherente arredor do comportamento destes animais. Coidabamos que ser escritor era moito máis sinxelo!

- Impactounos a información que nos deu sobre a maneira de actuar das formigas, especialmente aqueles datos relativos á súa agresividade e capacidade de traballo e organización.

- Resultou interesante oírlle contar como a súa adicación ó periodismo lle serviu de base para crear o espazo no que se desenvolve a novela: inspirouse nunha aldea que visitou hai anos para cubrir a noticia dun parricidio.

- Das respostas que deu ás preguntas que lle formulamos recordamos especialmente aquela na cal nos explicou que escribía, sobre todo, porque lle gustaba e  porque lle compracía ver como os personaxes cobraban vida e ían decidindo a historia por si mesmos.

Grazas, Tucho, por permitirnos aprender tantas cousas, sen libro e sen caderno!