Patrimonio inmaterial

Esta quinta feira preséntase no Museo do Pobo Galego o Arquivo do Patrimonio Oral da Identidade (APOI). Este traballo xurdiu da evolución do proxecto Sons e Voces da Identidade, programa de dixitalización, catalogación, estudo e difusión do patrimonio inmaterial que o Instituto de Estudos das Identidades do propio museo, que se creou en abril de 2007.Nos momentos iniciais, o proxecto contou cunha abondosa "materia prima", consistente nunhas 600 fitas recollidas directamente, ou baixo a súa dirección, por Xosé Luís Rivas, Mini, e Baldomero Iglesias, Mero. Trátase de materiais gravados nos últimos 35 anos de informantes da Galiza rural. Tamén se dispuña no fondo do Museo dunha colección de gravacións realizadas en 1994, como resultado do proxecto interactivo museo-escola Recupera-la tradición oral. Despois dun laborioso proceso de tratamento das gravacións orixinais, transcrición e construción dunha base de datos, o APOI está en condicións de entrar en funcionamento.Un arquivo destas características, público e accesíbel e que dá conta da autoría das achegas que se incorporan, pasará a ser un arquivo para o pobo galego, e para quen teña a ben participar nel.
Nova, vía Vieiros

Máis de mil primaveras para a nosa patria, para a nosa lingua

Irmáns! En pé, sereos. A limpa frente erguida; o corazón aberto a toda verba amiga. En pé! En pé, dispostos a non morrer sen ­loita. A oliva nunha man, a fouce noutra. Berremos alto e forte: A nosa terra é nosa!".
Manuel Caamaño, presidente en funcións do Pedrón, botou man deste poema de Ramón Cabanillas para resumir os densos discursos de fervor pronunciados tanto por membros da institución (como David Otero ou Xosé Ramón Fandiño) como polos galardoados cos pedróns de Ouro e Honra (os compoñentes de A Quenlla, Xosé Luís Rivas e Baldomero Iglesias, os populares Mini e Mero, así como a filóloga romanesa Mariana Ploae-Hanganu). Discursos, por outra banda, dirixidos por un sentido alegato de resistencia e de defensa da lingua, cultura e identidade galegas.
http://sarmientobiblioteca.blogspot.com/search?q=mini

Mini e Mero

Mini e Mero dende hai un tempo traballan co Museo do Pobo nun proxecto para colgar na rede material audivisual de todos. Nos vindeiros meses poderanse ver os primeiros resultados, ao redor de cen cortes de audio que se irán ampliando no futuro con moitas máis pezas e outros materiais, como fotografías e vídeos.
Di Mini "Hai cancións galegas e cancións de fóra que chegaron nalgún momento e callaron no pobo: está o que a xente nos contou", laiase de que agora os músicos galegos que comezan achéganse a este saber popular de xeito mediado, viciado a través das reinterpretacións que fixeron uns grupos e outros".
http://sarmientobiblioteca.blogspot.com/search?q=mini

Pedrón de Ouro-2009

Xosé Luís Rivas e Baldomero Iglesias foron distinguidos co premio Pedrón de Ouro-2009 polos esforzos e o traballo que realizan desde 1972 para recuperar e transmitir o patrimonio oral de Galicia.
O Pedrón de Ouro recoñece a personalidade ou entidade viva e residente en Galicia "que máis destaque na defensa e na promoción das diversas facetas da cultura nacional" ao longo do ano ou na traxectoria dunha vida.
Mini e Mero, que pertencen actualmente ao grupo de música tradicional 'A Quenlla', manifestaron en declaracións a EFE que o Pedrón de Ouro supón para eles unha "gran satisfacción", ademais dun "empurrón" para seguir recompilando cancións, refráns, lendas e outras expresións da cultura oral galega.
Ademais, Mini sinalou que ese galardón "tamén se lle está dando a moitas persoas" que desenvolven tarefas similares "en silencio", e asegurou que nin el nin Mero "o merecen", porque o seu traballo "é un acto egoísta, é beber dunha fonte na que outros non poden".
Os dous musicólogos coincidiron en que o "mérito en si" é ter a oportunidade de "redescubrirse a si mesmos" a través da investigación cultural que emprenderon hai case corenta anos, e que continúa hoxe en día, porque lles axudou a "vivir dun modo harmónico co ser de Galicia".
Mini e Mero recompilaron material por toda a xeografía galega, pero, fundamentalmente, na súa comarca natal, a Terra Cha, e as zonas de Boimorto e Mesía, onde exercen de profesores. Os etnógrafos aseguraron que é "imposíbel" contabilizar o material recompilado estes anos, arquivos que pretenden "difundir" e "poñer nun gran foro" porque "son patrimonio de todos".
Para iso, existe un proxecto de colaboración co Museo do Pobo Galego que permitirá acceder a unha base de datos de todo o patrimonio oral recollido durante estes anos polos novos Pedrón de Ouro, dentro dun ano, aproximadamente.
http://sarmientobiblioteca.blogspot.com/2009/03/mini.html

José Luís Rivas Cruz

A memoria histórica

Mini é Profesor de Educación Primaria. Compoñente do grupo "Fuxan os Ventos" desde o seu inicio ata 1982. Compoñente do grupo "A Quenlla" desde o seu inicio (1984) ata a actualidade. Compositor e adaptador de cancións galegas. Recopilador de folklore

Ten editados trece discos cos grupos xa citados. Creou a música para os vídeos "Historia dá lingua", "Vos señores dá palabra", "70 anos de nacionalismo", "Memoria de rosas", "Longa noite de pedra" con Baldomero Igrexas Dobarrio, "A carón dá escola" (traballo de recopilación de folklore de Nadal), "Cantares de cego I" (recopilación de "cantares de cego"), "Contos de vellos pra nenos" (recopilación de contos tradicionais", "Somos lenda viva" (recopilación de lendas tradicionais).