Redelibros.com

En dez días presentarase en Vigo Redelibros.com, a primeira rede social exclusivamente dedicada ao libro posta en marcha en Galicia. A vocación deste espazo é dobre. En primeiro lugar, pretende ofrecer todos os servizos das redes sociais, tanto de facer comunidade como de mantela comunicada e, ao tempo, ofrecer espazo en liña para a venda destinado ás librarías pequenas.

O proxecto leva en marcha un par de meses e agora está na fase de sumar as librarías. Esta rede social é un espazo que ten case un millón de títulos catalogados, de maneira que os membros da rede poden facer comentarios, recomendalos uns a outros, poden incorporar novos títulos ao fondo ou pedir opinións sobre eles. Será tamén un espazo de venda para as pequenas librarías de Galicia.

Vía La Voz de Galicia 02/11/2010

Librarías de Porto

Porto, o encanto das súas librarías(III)

Libraría Lello e Irmão

A historia da Libraría Lello e Irmão (en portugués: Livraria Lello e Irmão), tamén coñecida como Libraría Chardron ou simplemente Libraría Lello (Livraria Lello) remóntase ao1869, ano no que foi fundada na rúa dos Clérigos baixo o nome de "Libraría Chardron". Tras a morte do seu fundador vendeuse á sinatura Lugan & Genelioux Sucessores. No1894 a antiga Libraría Chardron foi vendida a José Lello que, por entón posuía xa unha libraría na rúa do Almada. Este en asociación co seu irmán, António Lello, cambioulle o nome en1919 por "Livraria Lello e Irmão".

O actual edificio, situado na rúa das Carmelitas 144, foi construído polo enxeñeiro Francisco Xavier Esteves e inaugurado en 1906. A súa fachada presenta detalles modernistas e neogóticos e destacan as dúas figuras pintadas a ambos os dous lados da porta representando a arte e a ciencia. No centro, "Lello & Irmao" e en letras douradas Livraria Chardrón. No seu interior destaca o xeso pintado imitando madeira, a escaleira vermella de acceso á planta superior e a gran vidriera do teito, que leva o monograma e o lema da libraría: "Decus in Labore" ("Dignidade no traballo") e que permite a entrada dunha luz natural perfecta para a lectura.

Na planta baixa, o parqué de madeira do chan está atravesado por unha estreita vía pola que circulaba un vagón de madeira, que axudaba aos empregados a trasladar libros. Na segunda planta hai dúas pequenas salas de lectura, nas que o visitante pode tomar un café mentres olla un libro e onde tamén se realizan pequenas exposicións de arte.
Nesta libraría rodáronse algunhas escenas das películas de Harry Potter.

Porto, o encanto das súas librarías (II)

Livraria-Alfarrabista Chaminé da Mota

Libraría fundada en 1981 e situada na rúa das Flores 28, na zona antiga da cidade.

É una libraría repleta de libros antigos, caixas de música, discos de vinilo e demais obxectos. Contén entre os seus fondos "algunhas obras clasificadas como raridade, ademais de numerosos manuscritos de escritores portugueses consagrados".

Porto, o encanto das súas librarías (I)

Livraria Latina Editora

Libraría na rúa Santa Catarina fundada por Henrique Perdigão en 1942, que ten na esquina da súa fachada un busto de Luís de Camoes, un dos maiores poetas en lingua portuguesa.

O seu fundador consideraba a Latina como «a máis moderna organización libreira e editorial do país». Alí podíanse atopar «libros de todo e para todos, sobre Letras, Filosofia, Artes e Ciencias e tamén tratados de Medicina, Ciruxía, Enxeñaría, Dereito, industrias téxtiles, metalúrxicas e eléctricas, contabilidade comercial, etc.» Vendía ás agachadas e con gran risco libros políticos e outros prohibidos polo réxime de Salazar, que incluían autores como Jorge Amado, Raul Rego, Henrique Galvão, Aquilino Ribeiro...

A el débese a iniciativa da primeira páxina literaria nos xornais de Porto, publicada en O Primeiro de Janeiro baixo a dirección do xornalista Jaime Brasil. Morreu prematuramente en 1944 nunha das súas viaxes a Brasil, país co que mantiña unha estreita relación afectiva, para comprar libros que divulgaría en Portugal.

Sucedeulle o seu fillo, Mário Perdigão, que mantivo intacta a Latina durante 53 anos, ata que foi renovada no ano 2004 por Henrique Perdigão, neto do fundador.

O novo espazo con materiais como a madeira e o aceiro, mantén unha espectacular parede repleta de libros.