PREMIOS XERAIS

O pasado sábado 9 de xuño a Illa de San Simón acolleu  a 29ª edición do Premio de Novela da editorial Xerais e a número 27 do Premio Merlín de Literatura Infantil.

A obra Tonas de laranxa de Manuel Lorenzo Baleirón e María Lorenzo Miguéns  (pai e filla), foi a gañadora do Premio Xerais de Novela 2012 . Os membros do xurado salientaron o rápido acordo: «Tivemos moi clara a escolla desde o primeiro momento, feito que deu como resultado unha rápida elección por unanimidade. Quedamos engaiolados polo sensitivo perfume a laranxa desta obra na que o lírico, o onírico e o simbólico se conxugan de xeito maxistral para dar lugar a unha novela fermosa que rende homenaxe á narrativa de Álvaro Cunqueiro».

María Lorenzo Miguéns (Tarrío, Dodro, 1986) é licenciada en Comunicación Audiovisual e na actualidade cursa estudos para a obtención do grao en Mestre de Primaria. O seu pai, Manuel Lorenzo Baleirón (Tarrío, Dodro, 1957) é mestre en Educación Primaria, licenciado en Filosofía e Historia da Arte e imparte clase nun instituto en Padrón. Ambos os dous son case descoñecidos no panorama literario. O coautor da novela explicou a peculiaridade da escrita conxunta: «Todas as obras son anónimas. Todas son colectivas. Para ir tecendo estas historias de ensoños, reloxos e laranxas fomos collendo palabras de aquí e de acolá, xuncas das Brañas de Laíño. Nunha lingua antiga. Irrenunciable».

O outro galardoado foi Marcos Calveiro (Vilagarcía, 1968), que recolleu o Premio Merlín por Palabras de auga. Esta obra narra a aventura de Amadou, un rapaz suahili que pertence a un clan de nómades. Segundo o xurado, que tamén foi unánime, «os pulmóns de África respiran nas follas deste libro coa forza de todo o continente». O autor,  avogado de profesión e coñecido por obras como O pintor do sombreiro de malvas, sinalou que “ o Merlín é o premio de referencia da Literatura Infantil e Xuvenil galega. Ver o meu nome aí canda os de Agustín Fernández Paz, Marilar Aleixandre, An Alfaya e tanto outros éncheme de orgullo”.

Parabéns aos premiados!

Agardamos impacientes a incorporación destas novidades aos fondos da nosa bibioteca .

Xavier Queipo gaña o Xerais de Novela 2011 con ‘Extramunde’

Xavier Queipo, Héctor Carré e Anxo Fariña

O fallo dos prestixiosos galardóns fíxose público no marco dun acto que tivo lugar na Illa de San Simón e ao que asistiron máis de 300 persoas

Un ano máis, e xa van 28, hai un novo gañador do prestixioso Premio Xerais de Novela, dotado con 25.000 euros. O galardoado nesta edición foi o escritor santiagués Xavier Queipo, pola súa obra Extramunde. Asemade, a editorial tamén declarou a Anxo Fariña como gañador do Premio Merlín de Literatura Infantil –por A chave da Atlántida– e a Héctor Carré do Premio Fundación Caixa Galicia de Literatura Xuvenil pola súa novela Febre.

O fallo fíxose público no marco dun acto literario-musical, ao que seguiu unha cea ao aire libre na illa de San Simón. Á velada asistiron máis de 300 persoas, entre as que se atopaban Roberto Varela, conselleiro de Cultura e Turismo; Javier Bas, alcalde de Redondela, ou Francisco López, director xeral do Libro, Arquivo e Bibliotecas.

O acto foi amenizado por O Leo i Arremecághona, o cantante de Matamá, e contou coa intervención de María Xosé Queizán, que rememorou as trobairitz, as donas occitanas que no século XII compuxeron cantigas na lírica medieval, unha xoia literaria que tería repercusión na cantiga de amor galega. Pechou o acto Manuel Bragado, director da editorial, que agradeceu a axuda proporcionada polos patrocinadores dos premios.

ÉXITO DA VIOLENCIA

A novela gañadora, Extramunde, foi valorada polo xurado como “un exemplo de calidade na escrita, na que destaca un arranque espectacular e a súa plasticidade”. O texto conta a historia dunha hoste de condenados pola Santa Inquisición, formada por eivados e torturados, que parte do santuario dos embruxados cara ao porto de Betanzos, guiados pola man do capitán Mourelle.

“A violencia terrible, o exorcismo brutal e o sexo constitúen algúns dos eixos temáticos desta excelente novela que encandila e atrapa ao lector coa súa poética expedicionaria”, apuntou o xurado na súa valoración.

Pola súa banda, o escritor e cineasta Héctor Carré sinalou que o éxito de Febre –que conta a historia dun tempo no que o wolframio era o ouro galego– foi escrita para a filla da súa muller “porque non me gustaba o que lía na escola”.

Con respecto a Anxo Fariña, este mostrouse “contentísimo” polo éxito de A chave da Atlántida, unha novela de ciencia ficción que na que mestura os mitos desa civilización antiga coa biotecnoloxía e a robótica.

XORNAL.COM 12/06/2011 - 13:55 h