Gústanos ... o galego

Aproveitando a celebración da XX Semana Cultural, o ENL do noso instituto instalou un "photocall" polo que pasaron a posar invitad@s, alumn@s e profes. A iniciativa desenvolvida pola CTNL permitiunos reunir todas estas imaxes que deixamos recollidas nete vídeo. Gústavos?

Gústame - IES de Curtis from Curtisbiblio on Vimeo.

Navega en galego

Fala a lingua de Galicia tamén na rede!!

O navegador da Internet fala por ti e nel vén, por defecto e como regra xeral, o español.

Neste blog (Navega en galego) sacámoste de dúbidas!

Aclarámosche de xeito automático cal é o idioma preferente do teu navegador.

De non usares  o idioma de Galicia, aparecerache unha vídeo-titoría e seguíndoa, nuns poucos clics poñerás a falar o teu navegador en galego.

A revista Tempos Novos crea unha publicación en galego na rede: temposdixital.com

Un paso máis na recuperación do espazo para os medios en galego na rede. A  revista Tempos Novos, que iniciou a súa andaina no ano 1997, comezará proximamente a súa edición dixital.

Información, opinión e debate na rede son as cartas de presentación desta publicación que  pretende "abrir o campo" de contidos, incluíndo ademais textos dirixidos a un público máis novo (entre 18 e 35 anos de idade), ampliando así o espectro do público lector do medio en papel. Por iso inclúe unha sección de deportes e prestará especial atención ás novas formas da cultura, manténdose na liña de xornalismo de análise e interpretación que vén caracterizando á revista Tempos Novos.

 Toda a información en: http://temposdixital.com/



flzta o ndl e o aninov n glg!

Iniciativa da Coordinadora Galega de Equipos de Normalización Lingüística (CGENL)



Ao chegaren estas datas, os nosos móbiles e as nosas contas nas redes sociais énchense de felicitacións de Nadal e Aninovo..., e normalmente son mensaxes que circulan de aparello en aparello e por internet. Por iso, a Coordinadora Galega de ENDL pon á vosa disposición esta páxina: para que demostredes o voso enxeño e a vosa creatividade.

Enviade as vosas mensaxes, cubride o formulario e votade polas que máis vos gusten. Ademais da satisfacción de ver navegar os teus SMS pola rede, as tres mensaxes máis votadas recibirán un lote de agasallos da CGENDL, por iso é importante que introduzades os voso datos.

Podes consultar o dicionario galego de SMS mais nel faltan moitos termos. Mandade as vosas palabras, as que vós empregades habitualmente nas vosas mensaxes.

Aínda que é unha actividade orientada ao alumnado do ensino non universitario, pode participar quen queira. Iso si, non hai agasallos para todos, mais... que mellor regalo hai que impulsar a nosa lingua!

Revoltallo de termos. A tecnoloxía en Galego.

Con esta actividade preténdese defender a idoneidade do uso do galego no campo da ciencia e da tecnoloxía no marco do proxecto colaborativo "Xornada pola Ciencia en Galego" que se vai celebrar o vindeiro 4 de novembro de 2010.

Traballarase concretamente o campo da tecnoloxía, e trataremos de dar a coñecer e difundir vocabulario técnico existente na nosa lingua, perfectamente válido para expresar e difundir tecnoloxía.

No ensino, o feito de afastar do galego determinadas materias do ámbito científico-tecnolóxico pode provocar a perda de vocabulario propio, xa que as linguas abarcan tódolos ámbitos e contextos. Para un bo coñecemento da lingua propia cómpre a súa utilización en calquera ámbito sen exclusión.

Non pretendemos facer un rigoroso glosario de termos, senón unha simple colleita de léxico tecnolóxico en galego de uso común que cómpre empregar e difundir.

A colleita farase a través dun formulario web aloxado en tecnoloxia.org, comezaremos recollendo aquela terminoloxía propia do galego utilizada no campo da tecnoloxía. Calquera persoa pode participar.

Unha vez teñamos recompilado suficiente léxico será hora de traballar con el na xornada do 4 de novembro. Na sección de propostas de actividades atoparás algunhas ideas de traballo e tamén podes enviarnos as túas.

O bilingüismo ou a imposición do español

O que se presenta neste post é un excelente documento social e histórico. Un anaco de realide materializado nun colexio de Friol que bate con toda a forza nos sentidos deixándoche pampo .
Trátase dun documental do programa "Vivir cada día" do ano 1979 no que se revela a forma na que toda unha xeneración foi educada. Alén do machismo e o rancio catolicismo, o ensino consistía na radical imposición do español, ou como o define a mestra que aparece no vídeo con toda a carga de desprezo do propio e o fomento do odio ao galego, o fundamento do ensino xiraba arredor da implantación do bilingüismo de ahí que o alumnado galegofalante tivese dificultades para expresarse, "por la falta de vocabulario" e en consecuencia "prefiera mantenerse callado"...

Vía Blog Carta Xeométrica

Pierre Michon, Gran Premio da Academia Francesa

Fais uns días mercamos a novela de Pierre Michon Os once, será unha desas lecturas compartidas co meu amigo Xaime. Aquí vos deixo unha reseña da Editorial Galaxia onde se atopa publicada:

"O escritor Pierre Michon, un dos escritores xa míticos da narrativa francesa actual, acaba de ser galardoado co gran premio de novela da Academia Francesa pola súa nova novela ‘Os once’, que Editorial Galaxia porá á venda a mediados do próximo mes de novembro dentro da colección Biblioteca Compostela de Narrativa Europea, que conta co apoio da Concellaría de Cultura do Concello de Santiago.

Editorial Galaxia continúa a súa liña editorial de achegar a lectores e lectoras galegos as novidades internacionais de maior actualidade e interese literario. Desta volta trátase de Pierre Michon (Creuse, 1945), un dos grandes autores franceses contemporáneos, unha figura xa mítica no ambiente literario francés, onde é coñecido por ser un dos escritores máis esixentes desde o punto de vista literario pese a manterse afastado dos cenáculos literarios parisinos. O autor acadou sona internacional con Vies minuscules, libro de relatos que publicou aos 37 anos. Na súa nova novela, ‘Os once’, conta a historia dun cadro exposto no Louvre e no que aparecen os membros do Comité de Saúde Pública durante a Revolución Francesa. Michon reconstrúe na novela a historia deste cadro e do momento histórico que aparece reflectido nel.

En ‘Os once’, a novela premiada agora pola Academia Francesa e que Galaxia vai publicar o mes próximo, Michon conta a historia do pintor François-Élie Corentin, a quen en plena Revolución Francesa lle encargan pintar un cadro no que aparezan retratados os membros do temido Comité de Saúde Pública, entre os que se encontraban Robespierre e Saint-Just, organismo que levou adiante a denominada política do terror. Nesta viaxe no tempo á que Michon arrastra ós seus lectores grazas á forza de evocación do relato, o escritor francés realiza unha crítica desapiadada do poder para, fronte os grandes persoeiros da Historia, situar as súas vitimas. ‘Os once’ recrea maxistralmente o París revolucionario, retrata os protagonistas da revolución e critica a Arte que se pon ao servizo do poder político."